ការបដិសេធមិនចរចាជាមួយរុស្ស៊ីគឺ "គ្រោះថ្នាក់"

រដ្ឋមន្ត្រីការបរទេសអូទ្រីស Alexander Schallenberg បាននិយាយបន្ទាប់ពីប្រធានអង្គការដើម្បីសន្តិសុខ និងសហប្រតិបត្តិការ (OSCE) ប្រចាំប្រទេសម៉ាសេដូនខាងជើង បានអនុញ្ញាតឱ្យរដ្ឋមន្ត្រីការបរទេសរុស្ស៊ីលោក Sergey Lavrov ចូលរួម កិច្ចប្រជុំរដ្ឋមន្ត្រីការបរទេស ប្រចាំឆ្នាំរបស់អង្គការនៅទីក្រុង Skopje ប្រទេសម៉ាសេដូនខាងជើងក្នុងសប្តាហ៍នេះថា "លោកខាងលិចមិនគួរមានអារម្មណ៍ខ្មាស់អៀនក្នុងការអង្គុយនៅតុចរចាជាមួយរុស្ស៊ីទេ"។

ជាមួយគ្នានេះ លោក Schallenberg ក៏បានស្វាគមន៍ចំពោះការសម្រេចចិត្តខាងលើ ហើយបានបន្ថែមថា គោលនយោបាយ ការបរទេស ដែលបានអនុវត្តនៅក្នុង OSCE គឺផ្អែកលើទស្សនវិស័យនៃ “ពហុភាគីនិយមបុរាណ”។

រដ្ឋមន្ត្រីការបរទេសអូទ្រីស Alexander Schallenberg។ (រូបថត៖ AP)

ទោះជាយ៉ាងណា តំណាងប្រទេសបាល់ទិកបានរិះគន់ការសម្រេចចិត្តរបស់ប្រទេសម៉ាសេដូនខាងជើង។ ជាក់ស្តែងកាលពីថ្ងៃទី 28 ខែវិច្ឆិកា តំណាងប្រទេសបាល់ទិកបាននិយាយថា ពួកគេនឹងមិនចូលរួមក្នុងកិច្ចប្រជុំថ្នាក់រដ្ឋមន្ត្រី OSCE នាពេលខាងមុខទេ ដោយសារតែមានការចូលរួមរបស់រុស្ស៊ី។

នៅក្នុងសេចក្តីថ្លែងការណ៍រួមមួយ រដ្ឋមន្ត្រីការបរទេសអេស្តូនី ឡាតវី និងលីទុយអានី បានសង្កត់ធ្ងន់ថា ការសម្រេចចិត្តអញ្ជើញរដ្ឋមន្ត្រីការបរទេស Sergey Lavrov មកសន្និសីទនៅប្រទេសម៉ាសេដូនខាងជើង ប្រថុយនឹងភាពស្របច្បាប់នៃជម្លោះរុស្ស៊ី-អ៊ុយក្រែន។

ចំណាត់ការនេះកើតឡើងនៅពេលដែលសម្ព័ន្ធមិត្តលោកខាងលិចរបស់អ៊ុយក្រែនស្វែងរកការប្រមូលផ្តុំការគាំទ្របន្ថែមទៀតសម្រាប់ទីក្រុងគៀវ នៅពេលដែលការប្រយុទ្ធនៅតែបន្ត។

កាលពីដើមសប្តាហ៍នេះ រដ្ឋមន្ត្រីការបរទេសរុស្ស៊ី លោក Sergey Lavrov ក៏បានប្រកាសថា លោកនឹងចូលរួមកិច្ចប្រជុំរដ្ឋមន្ត្រីការបរទេស OSCE នេះ។

កាលពីឆ្នាំមុន នៅពេលដែលប៉ូឡូញកាន់តំណែងជាប្រធានប្តូរវេនរបស់ OSCE រយៈពេលមួយឆ្នាំ ខ្លួនបានបដិសេធមិនអញ្ជើញ Lavrov ឲ្យចូលរួម។ នៅពេលនោះ រដ្ឋមន្ត្រីការបរទេសអូទ្រីស Alexander Schallenberg គឺជាមន្ត្រីលោកខាងលិចតែមួយគត់ដែលរិះគន់ការសម្រេចចិត្តនេះ។

កិច្ចប្រជុំកំពូលរបស់រដ្ឋមន្ត្រីការបរទេស OSCE នឹងប្រព្រឹត្តទៅចាប់ពីថ្ងៃទី 30 ខែវិច្ឆិកាដល់ថ្ងៃទី 1 ខែធ្នូ។ រដ្ឋមន្ត្រីការបរទេស Lavrov បានហោះហើរទៅកាន់រដ្ឋធានីម៉ាសេដូនខាងជើងនៅល្ងាចថ្ងៃទី 29 ខែវិច្ឆិកា។ យន្តហោះរបស់រដ្ឋមន្ត្រីការបរទេសរុស្ស៊ីត្រូវធ្វើដំណើរកាត់តាមដែនអាកាសទួរគី និងក្រិក ដើម្បីទៅដល់ម៉ាសេដូនខាងជើង។

យោងតាមផែនការដើម លោក Lavrov ត្រូវហោះហើរលើប្រទេសប៊ុលហ្គារី ប៉ុន្តែប្រទេសនេះបានបដិសេធមិនបើកដែនអាកាសរបស់ខ្លួនចំពោះយន្តហោះរបស់លោក Lavrov ។

គង់ អាញ់ (ប្រភព៖ russian.rt.com)

ប្រភព