អ៊ុយក្រែនចោទរុស្ស៊ីពីការវាយប្រហារតាមអាកាសលើក្រុងគៀវ មុនកិច្ចប្រជុំកំពូលណាតូ

លោក Serhiy Popko ប្រធានរដ្ឋបាល យោធា នៃតំបន់រដ្ឋធានី Kiev បាននិយាយនៅក្នុងសារបង្ហោះនៅលើបណ្តាញ Telegram របស់គាត់ ថា "សត្រូវបានវាយប្រហារទីក្រុងគៀវពីលើអាកាសជាលើកទីពីរក្នុងខែនេះ" ។

បុគ្គលនេះបញ្ជាក់ថា ព័ត៌មានបឋមបង្ហាញថា ប្រព័ន្ធការពារដែនអាកាសរបស់អ៊ុយក្រែន បានបាញ់ទម្លាក់យន្តហោះគ្មានមនុស្សបើក Shahed ទាំងអស់របស់រុស្ស៊ី មុនពេលពួកគេទៅដល់គោលដៅ។ បច្ចុប្បន្នមិនមានព័ត៌មានអំពីការខូចខាតឬអ្នកស្លាប់និងរបួសទេ។

ក្រុមអ្នកពន្លត់អគ្គីភ័យបានពន្លត់ភ្លើងនៅក្នុងចំណតរថយន្តក្នុងទីក្រុងគៀវ អំឡុងពេលការវាយប្រហាររបស់រុស្ស៊ីលើរដ្ឋធានីអ៊ុយក្រែនកាលពីខែឧសភា។ (រូបថត៖ Reuters)

កងទ័ពអាកាសអ៊ុយក្រែនបាននិយាយថា ស៊ីរ៉ែនបានបន្លឺឡើងនៅក្នុងរដ្ឋធានី Kiev និងនៅភាគខាងកើតនៃរដ្ឋធានីកាលពីព្រឹកព្រលឹមថ្ងៃទី 11 ខែកក្កដា។

យោងតាម Reuters សាក្សីបានឮសំឡេងផ្ទុះស្រដៀងនឹងសំឡេងនៃប្រព័ន្ធការពារដែនអាកាសស្ទាក់ចាប់គោលដៅ។

ការវាយប្រហារនេះបានកើតឡើងប៉ុន្មានម៉ោងមុនពេលកិច្ចប្រជុំកំពូលរបស់អង្គការណាតូនៅទីក្រុង Vilnius ប្រទេសលីទុយអានី ជាកន្លែងដែលមេដឹកនាំណាតូត្រូវបានគេរំពឹងថានឹងពិភាក្សាអំពីជម្លោះរុស្ស៊ី-អ៊ុយក្រែន និងផែនការដ៏ទូលំទូលាយលើកដំបូងរបស់សម្ព័ន្ធចាប់តាំងពីការបញ្ចប់សង្គ្រាមត្រជាក់ដើម្បីប្រឆាំងនឹងការគំរាមកំហែងនៃការឈ្លានពានរបស់រុស្ស៊ី។

ជម្លោះរុស្ស៊ី-អ៊ុយក្រែនបានបន្តអូសបន្លាយជាង ៥០០ថ្ងៃមកហើយ ហើយមិនមានទីបញ្ចប់ឡើយ។ ភាគីទាំងពីរបាននិងកំពុងធ្វើការវាយបកប្រឆាំងនឹងគ្នាកាលពីពេលថ្មីៗនេះ។ សំណើសន្តិភាពជាច្រើនសម្រាប់ជម្លោះត្រូវបានដាក់ចេញប៉ុន្តែមិនទទួលបានលទ្ធផលដោយសារតែភាពខុសគ្នានៅក្នុងទស្សនៈរវាងរុស្ស៊ី និងអ៊ុយក្រែន។

លោកខាងលិចបន្តបូមអាវុធចូលអ៊ុយក្រែន ដើម្បីប្រឈមមុខជាមួយរុស្ស៊ី។ រុស្ស៊ីជឿជាក់ថាការសម្រេចចិត្តរបស់សហរដ្ឋអាមេរិក និងប្រទេសណាតូក្នុងការផ្គត់ផ្គង់រថក្រោះដល់អ៊ុយក្រែនធ្វើឱ្យការចរចាររវាងរុស្ស៊ី និងអ៊ុយក្រែន "គ្មានន័យ"។

រុស្ស៊ីបានចោទប្រកាន់អាមេរិក និងសម្ព័ន្ធមិត្តម្តងហើយម្តងទៀតថា មានចេតនាព្យាយាមអូសបន្លាយជម្លោះ ដោយព្រមានលោកខាងលិចមិនឱ្យផ្តល់សព្វាវុធដល់អ៊ុយក្រែន ដោយសង្កត់ធ្ងន់ថា វានឹងធ្វើឱ្យជម្លោះកាន់តែកើនឡើង និងបណ្តាលឱ្យមានអ្នកស្លាប់ដោយមិនចាំបាច់ ដោយមិនផ្លាស់ប្តូរស្ថានភាពនៃសង្រ្គាម។

គង់ អាញ់ (ប្រភព៖ AFP)

មានប្រយោជន៍
អារម្មណ៍
ច្នៃប្រឌិត
ប្លែក
កំហឹង