អាមេរិកជឿជាក់ថា រុស្ស៊ីអាចដាក់ពង្រាយអាវុធនុយក្លេអ៊ែរ ទៅក្នុងលំហ

ទីភ្នាក់ងារព័ត៌មាន Bloomberg ដោយដកស្រង់ប្រភពមិនបញ្ចេញឈ្មោះ បាននិយាយថា សហរដ្ឋអាមេរិកបានព្រមានសម្ព័ន្ធមិត្តអំពីលទ្ធភាពដែលរុស្ស៊ីគ្រោងនឹងដាក់ពង្រាយអាវុធនុយក្លេអ៊ែរ ឬក្បាលគ្រាប់មិនពិតទៅក្នុងលំហនៅឆ្នាំនេះ។

ប្រព័ន្ធផ្សព្វផ្សាយអាមេរិកបានរាយការណ៍កាលពីសប្តាហ៍មុនថា ស៊ើបការណ៍សម្ងាត់អាមេរិកបានទទួលព័ត៌មានថា រុស្ស៊ីអាចនឹងដាក់ពង្រាយអាវុធប្រឆាំងផ្កាយរណបជំនាន់ថ្មី រួមទាំងអាវុធនុយក្លេអ៊ែរ ចូលទៅក្នុងគន្លងផែនដី ឬថាប្រទេសនេះគ្រោងនឹងធ្វើដូច្នេះ។

អាមេរិកជឿជាក់ថា រុស្ស៊ីអាចដាក់ពង្រាយអាវុធនុយក្លេអ៊ែរនៅទីអវកាសនៅឆ្នាំ២០២៤។ (រូបថត៖ Getty Images)

ក្រោយមកទីក្រុងមូស្គូបានបដិសេធយ៉ាងម៉ឺងម៉ាត់ចំពោះព័ត៌មាននេះ ដោយអ្នកនាំពាក្យវិមានក្រឹមឡាំង លោក Dmitry Peskov បាននិយាយថា វាគ្រាន់តែជាការប៉ុនប៉ងដើម្បីបញ្ចុះបញ្ចូលសមាជិកសភាអាមេរិកឱ្យអនុម័តជំនួយ យោធា បន្ថែមទៀតដល់អ៊ុយក្រែន។

នៅក្នុងអត្ថបទរបស់ Bloomberg ប្រភពបានអះអាងថា រុស្ស៊ីពិតជាកំពុងអភិវឌ្ឍអាវុធដែលមានមូលដ្ឋានលើលំហ សំដៅកម្ទេចផ្កាយរណបលោកខាងលិច។ ទោះជាយ៉ាងណាក៏ដោយ របាយការណ៍មន្ទីរបញ្ចកោណនាពេលថ្មីៗនេះ បានបង្ហាញថា ទីក្រុងមូស្គូមិនមានគម្រោងក្នុងការបំផ្ទុះអាវុធនុយក្លេអ៊ែរនៅក្នុងគន្លងនោះទេ ប៉ុន្តែវាមានហានិភ័យនៃគ្រោះថ្នាក់នុយក្លេអ៊ែរដែលអាចរំខានដល់ផ្កាយរណបមួយភាគបីដែលកំពុងធ្វើដំណើរជុំវិញគន្លង និងបង្កការបំផ្លិចបំផ្លាញដល់ប្រព័ន្ធទំនាក់ទំនងពិភពលោក។

ថ្លែងមតិកាលពីថ្ងៃទី ២១ ខែកុម្ភៈ ប្រធានាធិបតីរុស្ស៊ី លោក Vladimir Putin បានសង្កត់ធ្ងន់លើគោលជំហរ “ច្បាស់លាស់ និងតម្លាភាព” របស់ទីក្រុងមូស្គូ លើការពង្រាយអាវុធនុយក្លេអ៊ែរគ្រប់ទីកន្លែង រួមទាំងក្នុងលំហ។

លោកពូទីនបានបន្ថែមថា “យើងតែងតែប្រឆាំងដាច់ខាតចំពោះការដាក់ពង្រាយអាវុធនុយក្លេអ៊ែរនៅក្នុងលំហ។ រុស្សីមិនត្រឹមតែបានអំពាវនាវឱ្យប្រទេសដូចជាសហរដ្ឋអាមេរិករក្សាសន្ធិសញ្ញាប្រឆាំងនឹងអាវុធអវកាសប៉ុណ្ណោះទេ ប៉ុន្តែថែមទាំងបានសង្កត់ធ្ងន់ម្តងហើយម្តងទៀតអំពីតម្រូវការក្នុងការពង្រឹងសន្ធិសញ្ញាទាំងនេះ។

រដ្ឋមន្ត្រីការពារជាតិរុស្សី លោក Sergei Shoigu ក៏បានសង្កត់ធ្ងន់ថា ទីក្រុងមូស្គូ «មិនបានដាក់ពង្រាយ និងមិនមានបំណងដាក់ពង្រាយអាវុធនុយក្លេអ៊ែរក្នុងលំហអាកាសទេ»។

អ្នកនាំពាក្យក្រុមប្រឹក្សាសន្តិសុខជាតិអាមេរិក លោក John Kirby បានច្រានចោលរបាយការណ៍ដែលថា ការព្រមានរបស់សហរដ្ឋអាមេរិក គឺជា "ផែនការ" ដើម្បីបង្កើនជំនួយដល់អ៊ុយក្រែន ដោយពណ៌នាពួកគេថា "មិនសមហេតុផល" ហើយបញ្ជាក់ថា ការព្រួយបារម្ភរបស់ទីក្រុងវ៉ាស៊ីនតោន គឺពិតប្រាកដ។

សន្ធិសញ្ញាអវកាសខាងក្រៅឆ្នាំ 1967 ដែលដើមឡើយចុះហត្ថលេខាដោយសហរដ្ឋអាមេរិក សហភាពសូវៀត និងចក្រភពអង់គ្លេស ហាមឃាត់ការដាក់ពង្រាយអាវុធនុយក្លេអ៊ែរណាមួយនៅក្នុងគន្លងតារាវិថី។ សន្ធិសញ្ញានេះក៏ត្រូវបានចុះហត្ថលេខាដោយប្រទេសជាង 100 ផ្សេងទៀត។

ត្រាខាញ់ (ប្រភព៖ russian.rt.com)

ប្រភព