អង្ករ "បៃតង" មានតម្លៃ 200-300 ដុង/គីឡូក្រាម ខ្ពស់ជាងអង្ករធម្មតា។

រដ្ឋមន្ត្រីក្រសួងកសិកម្ម និងអភិវឌ្ឍន៍ជនបទ លោក Le Minh Hoan បានសង្កត់ធ្ងន់ថា គម្រោង “ការអភិវឌ្ឍន៍ប្រកបដោយនិរន្តរភាពលើផ្ទៃដី ១ លានហិកតា ស្រូវឯកទេសដែលមានគុណភាពខ្ពស់ និងបញ្ចេញឧស្ម័នទាប” នៅតំបន់ដីសណ្តទន្លេមេគង្គ អាចទទួលបានជោគជ័យ លុះត្រាតែមានការឯកភាព និងការចូលរួមយ៉ាងខ្លាំងក្លាពីមូលដ្ឋាន និងកសិករ។

ការថ្លែងនេះបានធ្វើឡើងក្នុងជំនួបជាមួយប្រមុខ និងអនុប្រធានគណៈប្រតិភូរដ្ឋសភាមកពីខេត្តក្រុងចំនួន ១២ ក្នុងតំបន់ដីសណ្តទន្លេមេគង្គ ដែលបានប្រារព្ធធ្វើនៅ ទីក្រុងហាណូយ នាល្ងាចថ្ងៃទី ២៦ ខែសីហា។

ទិដ្ឋភាពនៃជំនួបជាមួយប្រតិភូ រដ្ឋសភា នៅទីស្នាក់ការក្រសួងកសិកម្ម និងអភិវឌ្ឍន៍ជនបទ នារសៀលថ្ងៃទី២៦ សីហា

គម្រោងនេះត្រូវបានគេសាកល្បងបីរដូវកាលជាប់គ្នាក្នុងខេត្ត Can Tho , Tra Vinh, Soc Trang, Kien Giang និង Dong Thap។ លទ្ធផលដំបូងបង្ហាញថា កសិករបានកាត់បន្ថយបរិមាណគ្រាប់ពូជស្រូវ ជី ក៏ដូចជាតម្លៃផលិតកម្ម ស្របពេលដែលការបង្កើនផលិតភាព និងតម្លៃក្រោយប្រមូលផល។ ស្រូវក្រោយប្រមូលផលត្រូវបានទិញក្នុងតម្លៃ ២០០-៣០០ ដុងក្នុងមួយគីឡូក្រាមខ្ពស់ជាងវិធីធ្វើកសិកម្មប្រពៃណី។

យ៉ាងណាក៏ដោយ លោក ថាច់ ភឿក ប៊ិញ អនុប្រធានគណៈប្រតិភូរដ្ឋសភាខេត្តត្រាវិញបានសម្តែងការព្រួយបារម្ភអំពីកង្វះនៃការធ្វើសមកាលកម្មក្នុងការរៀបចំផែនការសម្រាប់ប្រព័ន្ធធារាសាស្ត្រ ការដឹកជញ្ជូន និងហេដ្ឋារចនាសម្ព័ន្ធឃ្លាំង។ លោកបានស្នើថា គួរតែមានយន្តការសម្របសម្រួលច្បាស់លាស់រវាងថ្នាក់កណ្តាល និងថ្នាក់មូលដ្ឋាន ក៏ដូចជារវាងមូលដ្ឋាន ដើម្បីធានាថា គោលបំណងរបស់គម្រោងមិនត្រូវបានប៉ះពាល់ឡើយ។

រដ្ឋមន្ត្រី Le Minh Hoan ថ្លែងមតិក្នុងជំនួបជាមួយគណៈប្រតិភូរដ្ឋសភា

ដោយចែករំលែកនូវកង្វល់ទាំងនេះ រដ្ឋមន្ត្រី Le Minh Hoan បានឲ្យដឹងថា ក្រសួងកសិកម្ម និងអភិវឌ្ឍន៍ជនបទបានស្នើឱ្យរដ្ឋាភិបាលរួមបញ្ចូល “ពាណិជ្ជករ” នៅក្នុងប្រព័ន្ធឧស្សាហកម្មស្រូវ ដើម្បីបង្កើនការធ្វើសមកាលកម្ម និងប្រសិទ្ធភាព។ លោកក៏បានអំពាវនាវដល់តំណាងរាស្រ្តរដ្ឋសភា ផ្សព្វផ្សាយស្មារតីនៃគម្រោងដល់ប្រជាពលរដ្ឋ ជួយផ្លាស់ប្តូរការគិត និងវិធីធ្វើកសិកម្ម ដើម្បីសម្រេចបាននូវគោលដៅដែលបានកំណត់។

បើតាមលោករដ្ឋមន្ត្រី ដើម្បីឲ្យឧស្សាហកម្មស្រូវមាននិរន្តរភាព ត្រូវតែមានប្រព័ន្ធអេកូឡូស៊ី ដោយមានការចូលរួមពីគ្រប់ភាគី រួមមានកសិករ ពាណិជ្ជករ អាជីវករ និងរដ្ឋ។ ជាពិសេស ថ្នាក់ដឹកនាំមូលដ្ឋានត្រូវតែចាត់ទុកនេះជា “បដិវត្តន៍” ដើម្បីឲ្យគម្រោងទទួលបានជោគជ័យ។

លោកស្រី Ha Thi Nga ប្រធានសហភាពនារីវៀតណាម និងជាប្រតិភូរដ្ឋសភាខេត្ត Dong Thap បានចែករំលែកថា គោលដៅពីរនៃគម្រោងគឺជួយកសិករផលិតបៃតង និងកាត់បន្ថយការបំភាយឧស្ម័នផ្ទះកញ្ចក់។ ប្រសិនបើធ្វើបានត្រឹមត្រូវ កសិករអាចទទួលបានប្រាក់ចំណូលបន្ថែមពីការលក់ឥណទានកាបូន។ នេះមិនត្រឹមតែបង្កើនប្រាក់ចំណូលរបស់កសិករប៉ុណ្ណោះទេ ប៉ុន្តែថែមទាំងជួយឱ្យអង្ករវៀតណាមទទួលបានអត្ថប្រយោជន៍នៅពេលនាំចេញ ស្របពេលដែលទាក់ទាញកម្មករវ័យក្មេងឱ្យត្រឡប់ទៅផលិតត្រឹមត្រូវនៅលើទឹកដីកំណើតរបស់ពួកគេ។

ទោះជាយ៉ាងនេះក្តី អ្នកស្រីក៏បានសង្កត់ធ្ងន់ថា កសិករត្រូវជម្នះឧបសគ្គពីការអនុវត្តផលិតកម្មបែបប្រពៃណី ដើម្បីសម្របតាមវិធីសាស្រ្តថ្មីៗ។

វ៉ាន់ ភោគ

ប្រភព៖ https://www.sggp.org.vn/lua-xanh-cao-hon-lua-thuong-200-300-dongkg-post755809.html