រុស្ស៊ី និងកូរ៉េខាងជើង ចុះសន្ធិសញ្ញាភាពជាដៃគូយុទ្ធសាស្ត្រគ្រប់ជ្រុងជ្រោយ

កាលពីថ្ងៃទី ១៩ ខែមិថុនា ប្រធានាធិបតីរុស្ស៊ី លោក វ្ល៉ាឌីមៀ ពូទីន និងមេដឹកនាំកូរ៉េខាងជើង លោក គីម ជុងអ៊ុន បានចុះហត្ថលេខាលើសន្ធិសញ្ញាស្តីពីភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ។ សន្ធិសញ្ញានេះត្រូវបានចុះហត្ថលេខានៅទីក្រុងព្យុងយ៉ាង បន្ទាប់ពីកិច្ចពិភាក្សារវាងមេដឹកនាំទាំងពីរក្នុងក្របខ័ណ្ឌនៃដំណើរទស្សនកិច្ចផ្លូវរដ្ឋរបស់ប្រធានាធិបតីពូទីនទៅកាន់ប្រទេសកូរ៉េខាងជើង។

ប្រធានាធិបតីរុស្ស៊ី លោក វ្ល៉ាឌីមៀ ពូទីន (ឆ្វេង) និងមេដឹកនាំកូរ៉េខាងជើង លោក គីម ជុងអ៊ុន នៅទីក្រុងព្យុងយ៉ាង ប្រទេសកូរ៉េខាងជើង។ រូបថត៖ រ៉យទ័រ

នៅក្នុងសន្និសីទសារព័ត៌មានបន្ទាប់ពីពិធីចុះហត្ថលេខា លោកពូទីនបានវាយតម្លៃសន្ធិសញ្ញាខាងលើថាជាឯកសារទម្លាយដែលតាមរយៈនោះប្រទេសទាំងពីរនាំមកនូវកិច្ចសហប្រតិបត្តិការទ្វេភាគីដល់កម្រិតថ្មីមួយ។ សន្ធិសញ្ញានេះកំណត់នូវភារកិច្ច និងទិសដៅសំខាន់ៗ ដើម្បីពង្រឹងទំនាក់ទំនងរវាងប្រទេសទាំងពីរឱ្យកាន់តែស៊ីជម្រៅក្នុងរយៈពេលវែង លើវិស័យ នយោបាយ ពាណិជ្ជកម្ម និងវិនិយោគ វប្បធម៌ ក៏ដូចជាសន្តិសុខ។

ប្រធានាធិបតីពូទីនបានសង្កត់ធ្ងន់ថា រុស្ស៊ីបន្តកិច្ចខិតខំប្រឹងប្រែងផ្នែកនយោបាយ និង ការទូត របស់ខ្លួន ដើម្បីលើកកម្ពស់សន្តិភាព និងស្ថិរភាពយូរអង្វែងនៅលើឧបទ្វីបកូរ៉េ។

ទន្ទឹមនឹងនេះ មេដឹកនាំកូរ៉េខាងជើង លោក គីម ជុងអ៊ុន បានបញ្ជាក់ថា ជាមួយនឹងការចុះហត្ថលេខាលើសន្ធិសញ្ញាភាពជាដៃគូយុទ្ធសាស្ត្រគ្រប់ជ្រុងជ្រោយ ប្រទេសទាំងពីរបាននាំសម្ព័ន្ធភាពរបស់ពួកគេទៅកាន់កម្រិតថ្មីមួយ។ តាមលោកថា នេះជាមូលដ្ឋានច្បាប់សម្រាប់ការពារ សន្តិភាព សន្តិសុខ និងការកសាងប្រទេសឱ្យរឹងមាំដើម្បីផលប្រយោជន៍ប្រទេសទាំងពីរ។

លោក គីម ជុងអ៊ុន ក៏បានបញ្ជាក់ដែរថា សន្ធិសញ្ញានេះគឺជាឯកសារស្ថាបនា ការពារ និងសន្តិភាព ឆ្លើយតបទៅនឹងទំនាក់ទំនងជាយុទ្ធសាស្ត្ររវាងប្រទេសទាំងពីរក្នុងយុគសម័យថ្មី នៅពេលដែលជំហរនៃប្រទេសទាំងពីរក្នុងរចនាសម្ព័ន្ធភូមិសាស្ត្រនយោបាយពិភពលោកបានផ្លាស់ប្តូរ។

កន្លងមក ជំនួយការប្រធានាធិបតីរុស្ស៊ី Yuri Ushakov បានបញ្ជាក់ថា សន្ធិសញ្ញាដែលទើបចុះហត្ថលេខាថ្មីគោរពគោលការណ៍ជាមូលដ្ឋានទាំងអស់នៃច្បាប់អន្តរជាតិ គឺមិនមានការប្រឈមមុខដាក់គ្នា និងមិនមានគោលបំណងប្រឆាំងនឹងប្រទេសទីបីនោះទេ ប៉ុន្តែមានគោលបំណងធានាស្ថិរភាពកាន់តែខ្លាំងនៅក្នុងតំបន់អាស៊ីឦសាន។

MINH CHAU

ប្រភព៖ https://www.sggp.org.vn/nga-trieu-tien-ky-hiep-uoc-doi-tac-chien-luoc-toan-dien-post745371.html